يابحر
*****
دايما باجيلك
واقعد معاك
اغسل همومى .. بالموج على شطك
بس النهارده
عايزك تفضفض
وتقولى مالك .. جزرك انا ومدك
احكيلى ع العشاق .. بيقولو ايه يابحر
كاتم كتير اسرار .. بين الصدف والصخر
احكيلى عن حبيبين
كانوا زمان دايبين
عاشوا لبعضيهم .. واتوعدوا يتلاقوا
احكيلى عن حالهم
لما الفراق جالهم
واللى مابينهم تاه .. من بعد مااشتاقوا
احكيلى عن صاحب
غدره اللى كان غالب
والشر كان جواه .. وماصنش يوم الوعد
وازاى هنا خله
ياما اشتكى غله
من كتر ما آمن .. لصاحبه فوق الحد
واحكيلى عن صياد
لفك بلاد و بلاد
فوق مركبه بشبكه .. واديته من خيرك
وازاى طمع واذاك
فجّر باروود جواك
خنقك بدخانه .. وزاد فى تدميرك
ولحد امتى يابحر .. تفضل كده صابر
شايل هموم وهموم .. صامد وبتكابر
بس انت برضه كتير
موجك جبال بيصير
لما الغضب يملاك .. بتكون ولا المجنون
وبنبقو زى الورق
بنصارعو فيك الغرق
ونقول خلاص ضايعين .. نلاقيك رجعت حنون
جننتنى وتعبت
اصلك عليا صعبت
وبجد تستاهل .. ريشه فى ايد فنان
ترسم وتتأمل
وتقول وتتغزل
وتكون يابحر كمان .. غنوة فى احلى ديوان
الشمس بتحبك
وسماها بتصحبك
دايما ف مد البصر .. بتكونو حاضنين بعض
اوصف واقولك ايه
قمرك يابختك بيه
صدقنى مش بحسد .. لايقين لبعض بجد
واستاذنك دلوقت .. طولت شكلى عليك
لكن اكيد راجع .. علشان افضفض ليك
هو انت مين غيرك بيحس بينا يابحر
موضوع: يابحر .. قصيده عاميه غنائيه 
الأربعاء أغسطس 05, 2009 4:34 pm
